Ногоо хатаах арга

Хүүхнүүддээ маш хэрэгтэй нэгэн зөвлөгөө оруулж байна. Хүнсний ногоо хямд байгаа энэ үед амжаад лууван, манжин, хүрэн манжин зэрэг ногоог их хэмжээгээр нөөцлөөд аваарай. Өвөл бага зэрэг дэвтээгээд л хүссэн хоолоо хийнэ гээд бод доо. Ногоотой шөл, ногоотой цуйван, хуурга гээд л. Хамгийн гол нь маш хялбархан... 

Ногоо хатаах дараалал

• Угааж цэвэрлэнэ.
• Нимгэн жижиг хэрчинэ.
• 1-2 долоо хоног дэлгэж хатаана. Өдөр бүр эргүүлж тойруулж хөдөлгөөрэй.
• Хатсан ногоогоо даавуун уутанд хийж ил газар хадгална.
• Хэрэглэхийн өмнө бага зэрэг дэвтээнэ.

Сонин уулзалт

Өнөөдөр сэтгэл дундуураа холхиж яваад бага настайгаа санаандгүй таарчихав.

Дэлгүүрт гацуур мод засагдан гадаа цас орж, хаа нэгтээгээс мандарин үнэртэхэд өөрийн эрхгүй нэг зөөлөн мэдрэмж дээшлээд байлдаг юм. Гацуур, цас, мандарин гурав бага насыг минь дууджээ. Байрныхаа айлуудын цонхон дээрх том том шилэн тоглоомтой гацуур моддыг тоолж, гэрэл нь хэрхэн анивчихийг хүйтэн үдэш хацар хамраа хайруулан байж хардаг сониуч хүүхэд байсансан. Аав ээжийн ажлын газраас өгсөн цаасан ууттай бэлэгнээс хамгийн түрүүнд мандариныг нь иднэ. Хальсыг нь хуулахаар нүд рүү цацарч хорсгоод дараа нь өрөөгөөр нэг ханхалдаг шаргал мандарин…

Жамц давсны ач тус

Ойрд цаг агаар халж, ахмад настан гэлтгүй залуусын маань хүртэл даралт ихсэх болж. Эм тан гэлгүйгээр ардын уламжлалт аргаараа хямд төсөр зардлаар эрүүл мэндээ хамгаалах нэгэн зөвлөгөөг оруулья.

Улбар шар жамц давсыг жижиглээд хавтгай гадаргуу дээр дэвсэж, 10-15 минут орчим гишгэхэд даралт бууж, хөөж хөшсөн байдал намждаг. Нэг удаа ингэж бэлдсэн давсаа та өдөр бүр ашиглах боломжтой.

Сануулахад, жамц давсан дээр өдөрт 15-аас илүү минут гишгэхгүй байхыг зөвлөж байна. Жамц давс даралтыг сорж, буулгахын зэрэгцээ хөлний уланд тань маш сайн массаж болох болно.

Гэртээ гацуур засахдаа

Шинэ жил хаяанд ирлээ. Та гэрийнхээ гацуур модыг хаана засья гэж бодож байна даа?  Танд зөвлөхөд шинэ жилийн гацуур нь мод махбодьтой тул түүнийг мод махбодид хамаарах зүүн эсвэл зүүн өмнөд зүгт байрлуулвал зохистой. Харин тоглоом элдэв чимэг өлгөсөн гацуур модыг гэрийн зүүн хэсэгт байрлуулвал гэр бүлийн эрүүл мэндийн орчин идэвхжинэ. Энэ хэсэгт байрлуулсан гацуур модонд хэт их тоглоом өлгөх хэрэггүй бөгөөд тусгай саванд ус ахиухан хийх хэрэгтэй. Гэр бүлийн зүүн өмнөд хэсэг нь эд хөрөнгийг хариуцдаг бөгөөд гацуур модоо байрлуулахдаа дээрх зааврыг мөрдөөрэй.

Орон гэртээ аз дуудах хамгийн хялбар арга

Аз гэдэг хэрэв хүсвэл хэнд ч хэзээ ч ирж болдог зүйл. Орон гэртээ тав тухтай, аз жаргалтай байж чадвал таны амьдрал тэр чигээрээ азтай байх болно. Хамгийн гол нь нөхцөлөө зөв бүрдүүлэх хэрэгтэй. Жижиг гэртэй байсан ч дулаахан орчин бүрдүүлж, хайраар дүүргэхийг хичээгээрэй. Хамгийн гол нь хуучин эд зүйлсээ бүү хадгал, бүү хураа. Үе үе гэртээ их цэвэрлэгээ хийж, хэрэггүй зүйлсээ хаях нь танай гэрийн тохижилтонд ч, ариун цэвэрт ч, гэр бүлийнхний сэтгэл санаанд ч хамгийн сайн “эм” болдог. Таны зориглон хаясан хуучин, хэрэггүй эд хогшилтой хамт шийдэгдээгүй асуудлууд ч аяндаа яваад өгнө.

Загас тэжээвэл...

Айл гэрт аквариум болон загас байрлах нь нэг талаар үзэмж нэмж, нөгөө талаар фенгшүйгийн хамгийн сайн зохицол болж чаддаг. Учир нь ус бол фенгшүйгийн үндсэн элемент. Харин аквариумтай усанд загас байснаар ус хөдөлгөөнд орж энергийг идэвхжүүлдэг байна.

Хэрэв та гэртээ загас тэжээхээр шийдсэн бол алтан загасыг эхний ээлжинд сонгоорой. Алтлаг өнгө амжилт дууддаг. Мөн найман алтан загас, нэг хар загасыг нэг дор тэжээвэл алтан загас нь энерги, хар загас нь хамгалаалалтыг билэгдэж, гэрт чинь ирэх өвчин зовлон, муу бүхнээс эздийгээ хамгаалж, гай зовлонг өөр дээрээ авж үхдэг домтой. Хэрэв хар загас үхвэл өөр нэг харыг дахин авч хамгаалалтаа хүчирхэгжүүлэх хэрэгтэй.

Аквариумдаа дараах 5 элементийг бүрдүүлж өгөөрэй.
- Ус (аквариум дахь ус)
- Мод (аквариумын ургамал)
- Төмөр (аквариумын тавиур, таг)
- Чулуу (аквариумын чулуу, хад хайрга)
- Гал (улбар, алтлаг шар загас эсвэл гэрэлтүүлэг)

Аквариумыг байрлуулах сайн зүгүүд:
- Зүүн урд: Эд баялагийн зүг. Гэр бүлд эд хөрөнгө, баялаг авчирна.
- Хойд зүг: Амжилтын зүг. Ажил мэргэжилд амжилт авчирна:
- Зүүн зүг: Эрүүл мэндийн зүг. Эрүүл энх, өнөр өтгөн амьдралыг бэлгэднэ.

Галын өрөөний тохижилт

Гал тогооны өрөөнд хоол хүнс боловсруулагдаж, бас хадгалагдаж байдаг болохоор энэ хэсэг хамгийн цэвэр байх ёстой. Бохир заваан, тоос шороотой орчинд хоол унд бэлтгэвэл хоол биш хор болж магадгүй учраас хайртай гэр бүлийнхээ төлөө галын өрөөгөө өдөр бүр цэвэрлэж, гоёмсог чамин эдлэлүүдээр чимж, сайхан үнэртэй цэцэг, агааржуулагч байршуулж байгаарай.

Бас таны гараа гарган хийж байгаа хоолны амтат үнэр энэ өрөөнд хамгийн сайхан энергийг авчрах болно.

Дараах зүйлсийг анхаар. Энэ өрөөнд гал, ус гэсэн хоёр том махбодь зэрэгцэн байдаг. Өөрөөр хэлбэл тосгуур, плитка гэсэн үг. Плиткаа аль болох хөргөгч, угаалтуураасаа зайтай байлгахыг хичээгээрэй. Бүр болохгүй нөхцөлд дунд нь жижигхэн ч хамаагүй тусгаарлах зүйл байрлуулаарай.

Цуурсан, амсар нь эмтэрсэн аяга таваг, үйлдвэрийн өө сэвтэй сав суулгыг галын өрөөнөөсөө шууд гаргахыг зөвлөж байна. Монголчууд эрт дээр үеэс сэтэрхий амсартай аяганд хоол иддэггүй байсан шүү дээ. Энэ нь хоол хүнсний эрчим хүчийг үгүй хийж эрүүл мэндэд сөргөөр нөлөөлдөг. Өө сэвтэй аяга таваг, сав суулга гэр бүлд асуудал байгааг гэрчилдэг учраас олон зүйл бодолгүй шууд л хаясан нь дээр.

Мөн хогийн сав хаягдлыг цуглуулна гэдэг утгаараа гал тогооноос гаргах, эсвэл угаалтуурын доор шүүгээ хийж түүндээ тавих хэрэгтэй. Хогийн шүүрийг ч мөн адил.

Мөнгөний мод буюу халбаган кактус

Навч нь халбаганы толгой шиг бөөрөнхий, бэлцгэр энэ мод айл бүрт л байдаг. Үүнийг мөнгө дуудах, мөнгө зөгнөх, мөнгө авчрах ид шидтэй гэж хүмүүс бэлгэдэн ургуулдаг юм. Хэрэв танайд ийм ургамал байгаа бол навч бүрийг нь шинэхэн шажигнасан зоос байна гэж төсөөлөн имэрч, тоос шороог нь арчилж хайрлаж байгаарай. Өдрөөс өдөрт өнгө засаж, шинэ навч шинэ нахиа соёолж буйг нь харахад урамтай сайхан байх болно.

Байршил нь зүүн зүг, болж өгвөл зүүн өмнө зүгт илүү тохиромжтой. Учир нь зүүн урд хэсэг бол мөнгөний булан гэж Фенгшүйд тооцогддог.

Таны мөнгөний мод сайхан ургаж байвал таны түрийвчинд энэ хэмжээгээр мөнгө урсан орж ирэх болно. Амьд ургамал, амьд байгалийг хайрлаж тордвол тэр танд эргээд л сайхан бүхнийг авчрах нь мэдээж. Фэнгшүйгийн онолыг зөв хэрэгжүүлж чадах юм бол ямар ч бэлэг тэмдэг байсан мөнгө таны хүссэнээр өсөн үржих болно.

Гал зуухаа баруун хойд буланд бүү байрлуулаарай.

Фенгшүйгийн ихэнх зөвлөгөөн дээр галын өрөө тэнд байж болохгүй, ийм байж болохгүй гэж заадаг. Би өөрийнхөө галын өрөөг эргүүлж тойруулан сайтар харсан юм. Дундаж байрлал. Нэг их сайн ч биш, бас бүр муу ч биш. Эзэгтэйн хувьд гэрийн хамгийн чухал, бас зайлшгүй анхаарах ёстой өрөө бол галын өрөө билээ. 

Гэхдээ нэгэнт баруун хойд хэсэгт байрласан галын өрөөтэй бол нийтийн орон сууцны хувьд ямар нүүлгэлтэй биш. Харин зарим зүйлсийг засаж байрлуулахад л Фенгшүйгийн гол зорилго. 

Эхлээд ширээгээ сонголоо. Гэр бүлээрээ тойрон сууж хооллодог, халуун дулаан уур амьсгалыг бүрдүүлдэг учраас бүгд сууж болохуйц хэмжээтэй ширээ сонгох хэрэгтэй. Дугираг байвал илүү сайн ч өөрт таалагдах бас тав тухтайг сонгов.

Энэ өрөөнд зайлшгүй хэрэгтэй зүйл бол хоолны эвгүй үнэр, хиншүү хярвас тархахаас хамгаалдаг уур шүүгч байдаг. Гал тогооны өрөө чинь том хэмжээтэй бол тухтай бас тансаг харагдах буйдан байрлуулвал бүр ч дажгүй. Эртний эдлэл, аяга тавагны цуглуулга, уран зургийг байрлал, өнгө зохицлыг нь олж байрлуулвал их сайхан харагддаг юм шүү.

Плиткаа баруун хойд буланд байрлуулахаас зайлсхийгээрэй. Учир нь баруун хойд зүгийн төмөр махбодь нь гэрийн эзэн буюу аавын буланд тооцогддог юм байна. Төмрийн буланд байгаа их гал гэрийн эзний хийморь сүлд, ноён нурууг шатаана гэж үздэг юм байна. Мөн энэ зүг нь айл гэрийн бурхантай харилцах хаалга болж өгдөг учраас тухайн айлын өөдлөн дэвжих замыг хаах аюултай.

Иймээс галын өрөө чинь баруун хойд хэсэгт байдаг бол гэрийн гал голомт болсон бас галыг хамгийн их илэрхийлэх зуух, плитканыхаа байрлалыг өөрчлөхийг зөвлөж байна.

Мөнгө дуудах аргууд

Солонгосууд “Мөнгө их хураагаарай” гэж ерөөдөг. Эхлээд гайхдаг байсан ч дараа нь энэ үг үнэхээр зөв юм байна гэж бодох болсон. Мөнгө хураахад тань нэмэр болог...

• Танд ирж буй орлого 100 төгрөг ч бай, тэрбум төгрөг ч бай ирэх бүрдээ том жижиг биетэй ирдэг. Тухайн орлогоос дээжийг нь өөртөө үлдээж байгаарай. Дээжийг нь хадгалсан бол биеийг нь буюу бүгдийг нь үрсэн ч болно. 

• Шинийн 2-ны саранд түрийвчээ онгойлгон мөнгөө харуулж, улам их арвижаарай гэж хурайлаарай. Бас хавирган сартай үдэш халаасанд дахь мөнгөө шаржигнуулахдаг. Сар томрох тусам таны халаасан дахь мөнгө үржинэ. 

• Хос самрыг хувцасныхаа халаасанд хийгээд биедээ авч яваарай. Самар нь тарни домын зан үйлд өргөнөөр хэрэглэгддэг ба эд хөрөнгө,элбэг хангалуун, өсч үржих, дэгжиж дээшлэхийн бэлгэдэл.

• Нүхтэй зоосон мөнгө халаасандаа хийж явбал мөнгөөр тасардаггүй. Ийм зоосийг олоход амаргүй ч өөрөө бэлдэж болно. Ням гаригт, тэгэхдээ шинийн 4-12-ны хооронд оройн 23.20-24.10 цагийн хооронд зоосоо нүхэл, эсвэл бага зэрэг нугал.

• Хэрвээ та засал ном хийлгэхээр сүм хийд рүү явбал баруун хөлийнхөө өсгий дор зоосон мөнгө хийгээрэй. Ингэвэл мөнгөний асуудалд үргэлж аз хиймортой байна.

• Пүрэв гаригт өглөө нүүр гараа угаахдаа алтан буюу мөнгөн сав суулганд ус хийж угаадаг.

• Түрийвчин дэх сүүлчийн мөнгөөрөө юм бүү ав, түрүүвчээ бүү хоосол. Эс тэгвэл мөд мөнгөтэй болохгүй.

• Толийг гал тогооны өрөөнд, эсвэл зочны өрөөнд ширээний хажууд өлгөвөл эд баялаг, мөнгө хөрөнгийг гэрт авчирдаг.

• Нар жаргасны дараа мөнгөө тоолбол мөнгө тогтдоггүй тул болж өгвөл өглөө тоолж байгаарай. Ер нь нар жаргаснаас хойш эд хөрөнгө, мөнгө гадагш гаргах муу байдаг.

• Машин, байр, хонь малаа зарах гэж байгаа бол ногт, цулбуур, хадаг, сахиусаа заавал авч бай. Авалгүй хамт өгөөд явуулбал буянаа өгнө гэсэн үг.

• Хумсаа зөвхөн мягмар, баасан сарын шинэдээр эсвэл арван тавны сартай байхад хумсаа авч байгаарай.

• Нар жаргаснаас хойш гэрээ бүү цэвэрлэ. Ялангуяа хог шүүрдэх. Элбэг хангалуун байдлаа шүүрдээд хаячихна гэсэн үг. Шалаа орой угаавал хөрөнгөө угаана гэсэн үг. Шалаа үүднээсээ эхэлж угаавал аз жаргалгүй болно гэж үздэг.

• Ширээн дээр мөнгө бүү тавь. Харин ширээний бүтээлгэн доор жаахан мөнгө хийхэд гэрт дандаа мөнгөтэй байхаас гадна хулгай орж, гарлага гарахгүй.

• Зээлж авсан мөнгөө авснаасаа бага мөнгөн тэмдэгтээр өг. Мөнгийг зүүн гараараа авч баруун гараараа өгдөг. Мөнгө өөрөөс чинь зугтаад явчихгүйн тулд гуйлга гуйсан хүнд мөнгө өгөхдөө ямар ч тохиолдолд нүд рүү нь бүү хараарай.

• Ням гарагт бусдад мөнгө бүү зээлдүүл. Даваа гаригт санхүү, мөнгөтэй холбоотой үйлдэл бүү хий. Мөн даваа гаригт хүнээс битгий мөнгө зээлээрэй. Мягмар гаригт битгий хүнд мөнгө зээлдүүлээрэй. Баасан гаригт өрөө битгий төлөөрэй.

• Таны ажиллаж байж олсон мөнгө танай гэрт тогтоосой гэж хүсч байгаа бол орлого олсон өдрөө нэг ч төгрөг үрэлгүй гэртээ хонуул. Хөршдөө талх, давс зээлдүүлж болохгүй, учир нь хангалуун байдал танай гэрийг орхиж, өөр гэр бүл рүү очно.

Дээрх зөвлөгөөнүүдийг бүгдийг нь амьдралд хэрэгжүүлэх боломжтой учраас тантай хуваалцахыг хүслээ. 

Мөнгө их хураагаарай!